Donald Trump i jep Vladimir Putinit një ultimatum të ri prej “10 ose 12 ditësh” për të ndalur luftën në Ukrainë

Keystone (AP Photo/Evan Vucci)

Presidenti i Shteteve të Bashkuara, Donald Trump, ngriti tonet kundër Vladimir Putinit të hënën gjatë një takimi në Skoci me Kryeministrin britanik Keir Starmer, duke i dhënë homologut rus një afat të ri prej “10 ose 12 ditësh” për t’i dhënë fund konfliktit në Ukrainë, përndryshe do të përballet me sanksione të ashpra.

“Po vendos një afat të ri, rreth 10 ose 12 ditë nga sot. Nuk ka arsye për të pritur më. Nuk po shohim asnjë përparim,” deklaroi presidenti amerikan, duke folur nga resorti Turnberry në Skoci.

Në mesin e korrikut, Trump i kishte dhënë Putinit një afat prej 50 ditësh për të përfunduar luftën në Ukrainë, duke paralajmëruar gjithashtu një riarmatim të madh të Kievit përmes NATO-s, transmeton albinfo.ch.

Sanksione të mundshme “sekondare”

Trump tha gjithashtu se po shqyrton vendosjen e sanksioneve “sekondare”, të cilat do të synonin shtetet që vazhdojnë të blejnë produkte ruse, siç janë hidrokarburet, për të tharë burimet financiare të Moskës.

Duke folur në shkallët e një resorti luksoz golfi në pronësi të familjes së tij në Turnberry, Trump shprehu zhgënjimin e tij të thellë ndaj homologut rus: “Jam shumë i zhgënjyer nga Putin,” tha ai.

Ukraina falënderon

Nga ana tjetër, Ukraina përshëndeti vendosmërinë e presidentit amerikan. “Faleminderit Presidentit Donald Trump për forcën e treguar dhe për një mesazh të qartë për paqen përmes forcës,” deklaroi kreu i administratës presidenciale ukrainase, Andrii Yermak, në rrjetin social X.