Zvicra, ndër shtetet me pasaportën më të fuqishme në botë

Këto janë pasaportat më të fuqishme në botë

Pasaporta zvicerane renditet ende lart në krahasimin ndërkombëtar, transmeton albinfo.ch.

Zvicra mban vendin e pestë në renditjen e vitit 2025 të pasaportave më të “fuqishme” në botë, të publikuar javën e kaluar nga konsulenca Henley & Partners.

I përditësuar dy herë në vit, indeksi vlerëson lirinë e lëvizjes së ofruar nga secila pasaportë, bazuar në të dhënat nga Shoqata Ndërkombëtare e Transportit Ajror (IATA). Ai merr në konsideratë vendet e arritshme pa vizë, me vizë në mbërritje ose nëpërmjet autorizimit elektronik.

Qytetarët zviceranë tani mund të hyjnë në 187 vende pa vizë – nga 190 në vitin 2024. Tre vendet për të cilat tani kanë nevojë për vizë janë Burkina Faso, Mauritania dhe Pakistani.

Zvicra është lënë pas nga fqinjët Franca, Gjermania dhe Italia, qytetarët e të cilave mund të udhëtojnë në 192 vende pa viza.

---