RAI nis transmetimet në arbërisht më 21 shtator, një epokë e re për kulturën shqiptare në Itali

Nga 21 shtatori, zëri arbëresh në ekranet e RAI-t

Më 21 shtator, Radiotelevizioni Italian (RAI) do të nisë transmetimin e programit të parë në gjuhën arbëreshe në Kalabri, duke shënuar një moment historik për ruajtjen dhe promovimin e gjuhës e kulturës shqiptare në Itali, transmeton albinfo.ch.

Ky format mediatik, i cili do të ofrohet me emisione javore në televizion dhe programe ditore në radio, synon të pasqyrojë jetën, traditat dhe sfidat e komuniteteve arbëreshe, duke u dhënë atyre një hapësirë të dedikuar në skenën mediatike italiane.

Programi do të përfshijë lajme, muzikë, kultura dhe tema sociale, duke u shndërruar në një urë të re komunikimi mes Italisë dhe Shqipërisë. Përmes kësaj nisme, RAI jo vetëm që pasqyron diversitetin kulturor të vendit, por edhe kontribuon në mbajtjen gjallë të një trashëgimie gjuhësore që ka mbijetuar për më shumë se pesë shekuj.

Nisja e këtij transmetimi vlerësohet si një hap i rëndësishëm për identitetin dhe përkatësinë e arbëreshëve, të cilët kanë ruajtur me përkushtim gjuhën dhe zakonet e të parëve. Njëkohësisht, ky projekt forcon marrëdhëniet kulturore mes Italisë dhe Shqipërisë, duke dëshmuar respekt dhe vlerësim të ndërsjellë për një komunitet me rrënjë të thella historike./Albinfo.ch

---