A janë sekondot zviceranë më të mirë?

Në ushtrinë zvicerane gjithnjë e më shumë shërbejnë zviceranët me prejardhje të huaj. Një anketë e realizuar me 12 mijë rekrutë nga gazeta „Schweiz am Sonntag” tregon se sekondot janë më të interesuar të vazhdojnë tutje në ushtrinë zvicerane sesa vetë zviceranët.

17 për qind e rekrutëve zviceranë me prejardhje të huaj janë të gatshëm për të vizituar shkollën e nënoficerëve, në krahasim me 13 për qind të zviceranëve.

Dhe jo vetëm në ushtri, madje edhe me pjesëmarrjen politike sekondot janë më aktivë.
Politikologu Andrea SCHLENKER, studiues në Universitetin e Lucernit, për herë të parë ka hulumtuar qëndrimet e qytetarëve me shtetësi të dyfishtë në Zvicër.

Studimin «European Political Science Review», të cilin e publikon gazeta „Schweiz am Sonntag”, vjen në përfundim se  zviceranët, të cilët kanë më shumë se një pasaportë në vend nuk ndjehen më pak të lidhur se sa ata që kanë vetëm pasaportën e kuqe.

Nuk ka rëndësi nëse të anketuarit fillimisht ishin gjermanë, italianë apo kosovarë. Identifikimi me atdheun e ri rezulton gjithashtu të jetë i fortë kur lidhja emocionale me vendin e origjinës është e paprekur.

Janë anketuar një total prej 1764 njerëzve, pjesëmarrës në politikë.

Rezultatet treguan se qytetarët me shtetësi të dyfishtë nuk ndryshojnë nga zviceranët.

66 për qind e të anketuarve kanë deklaruar se kanë marrë pjesë në zgjedhjet e fundit nacionale – ndërsa qytetarët zviceranë janë deklaruar  vetëm 61 për qind.