Kush e mbron hapësirën ajrore zvicerane nga sulmet hibride?

(KEYSTONE/Anthony Anex)

Kush mbron hapësirën ajrore të Zvicrës nga ndërhyrjet e qëllimshme, si p.sh. dronët apo sinjalet penguese? Këtë pyetje po e ngre Komisioni i Sigurisë në Këshillin Kombëtar, duke kërkuar qartësi nga Qeveria Federale, përcjell albinfo.ch.

Në kushte normale, hapësira ajrore mbrohet nga Forcat Ajrore, policia, kantonet dhe kompania Skyguide. Por përgjegjësitë bëhen më të paqarta kur bëhet fjalë për sulme hibride – si spiunime me dronë, sulme kibernetike apo fushata dezinformimi. Deputetja socialdemokrate Linda de Ventura paralajmëron për një “kaos kompetencash” dhe kërkon që ligjet të përshtaten.

Ajo propozon krijimin e një qendre të re për mbrojtjen nga dronët, ndërsa kolegu i saj nga SVP, Thomas Hurter, paralajmëron se teknologjia e dronëve po zhvillohet aq shpejt sa legjislacioni nuk mund të ecë me të njëjtin ritëm.

Ministri i Mbrojtjes Pfister ka premtuar një raport strategjik deri në fillim të vitit 2026, pas së cilës do të mund të diskutohen masa konkrete.