Pesë të dyshuarit për terrorizëm dërgohen në gjykatë

Pesë persona të arrestuar ditë më parë nën dyshimet për terrorizëm, janë dërguar të dielën pasdite në Gjykatën Themelore të Prishtinës. Sipas njoftimeve, të dyshuarit pritet të paraqiten para gjyqtarit të procedurës paraprake, Vehbi Kashtanjeva. Ndërkohë kryetari i Gjykatës Themelore, Hamdi Ibrahimi, ka bërë të ditur se seanca pritet të vazhdojë deri në orët e vona të mbrëmjes, ndërkaq vendimi mund të shpallet nesër.

Burime të Radio Televizionit të Kosovës (RTK) thonë se tashmë dihen emrat e të dyshurave, dhe ata janë: Enis Latifi dhe Besnik Latifi, nga Vushtrria dhe Milazim Haxhiaj e Gazmend Halilaj nga Istogu, ndërkaq ende nuk dihet emri i të dyshuarit të pestë. Sipas këtij informacioni, tek i dyshuari Enis Latifi janë gjetur dorëza, helm si dhe flamuj të ISIS-it. Për shishen me helm që është gjetur në çantën e të dyshuarit Enis Latifi e ka konfirmuar edhe avokatja Sabrije Jashari.

Këta të dyshuar janë arrestuar në orët e hershme të mëngjesit të së shtunës në afërsi të liqenit të Badovcit. Sipas policisë në veturat që ishin të dyshuarit janë gjetur pajisje që propagandojnë ISIS-in. Të alarmuar rreth sigurisë së fabrikës së ujit në liqenin e Badovcit autoritetet e sigurisë të shtunën për disa orë e ndërprenë furnizimin me ujë për Prishtinën, derisa analizat laboratorike treguan se uji nuk kishte qenë i kontaminuar.