SHBA: Ndalohet përkohësisht shqyrtimi i të gjitha kërkesave për azil

Keystone (AP Photo/Evan Vucci)

Administrata e presidentit amerikan, Donald Trump ka pezulluar të gjitha vendimet për kërkesat e azilit, pas sulmit në Washington ku u qëlluan dy pjesëtarë të Gardës Kombëtare, ka bërë të ditur drejtori i Shërbimit të Shtetësisë dhe Imigracionit të SHBA-së (USCIS), Joseph Edlow.

Edlow ka deklaruar se ky pezullim do të qëndrojë në fuqi “derisa të sigurohemi se çdo i huaj është kontrolluar dhe verifikuar në shkallën maksimale të mundshme”.

Ndryshe, njoftimi erdhi pak orë pasi presidenti Trump premtoi se do ta pezullojë përgjithmonë migrimin drejt SHBA-së nga të gjitha vendet e botës së tretë, transmeton albinfo.ch.

Zyrtarët e USCIS-it, që funksionon nën Departamentin e Sigurisë së Brendshme, janë urdhëruar të mos aprovojnë, refuzojnë apo mbyllin asnjë kërkesë për azil të paraqitur nga cilido nacionalitet, shkruan BBC.

Punonjësit mund të vazhdojnë shqyrtimin teknik të aplikimeve, por pa marrë vendim përfundimtar.

“Pasi të arrini në fazën e vendimmarrjes, ndaloni dhe mbani dosjen”, thuhej në udhëzimin e brendshëm.