Gjykata Speciale, as këtë javë nuk debatohet në kuvend

As në seancën e së enjtes nuk do të ketë shqyrtim të amendamentit kushtetues, i cili i hap rrugë themelimit të Gjykatës Speciale. Kryetari i Kuvendit të Kosovës, Kadri Veseli, pas mbledhjes së Kryesisë së Kuvendit, tha se Qeveria nuk e ka riproceduar amendamentin kushtetues, andaj sipas tij kjo çështje nuk do të diskutohet këtë javë në Kuvendin e Kosovës.

“Ndoshta edhe ju jeni mërzitur me mua, meqë në njëfarë forme është e njëjta pyetje. Më lejoni të ritheksoj se Kuvendi i Republikës së Kosovës, kjo kryesi e cila merr vendim për pikat e rendit të ditës, nuk mund të riprocedojë pa e pasur riprocedimin nga Qeveria e Kosovës. Nuk mund të riprocedojmë pa e pasur nga Qeveria për amendamentet kushtetuese, pastaj, pasi t’i kemi kaluar amendamentet kushtetuese, do ta kemi edhe projektligjin i cili lidhet me dhomat e specializuara”, u tha gazetarëve të hënën Kadri Veseli.

Veseli, ndërkaq, ka komentuar dhe rreth arrestimeve të fundit, nën dyshimin për terrorizëm. Ai tha se qytetarët e Kosovës duhet të jenë të kënaqur me efikasitetin e treguar nga organet e rendit. Në të njëjtën kohë, Veseli tha se kurrë nuk do të tolerohen personat të cilët mund të kenë synim aktet terroriste.

“Kurrë nuk do të tolerohen fundërrina të tilla, që Kosovën, e cila ka orientim perëndimor, të tentojnë ta drejtojnë kah drejtimi i cili është humnerë dhe është vetëm primitivizëm dhe asgjë më shumë”, tha ai.

Ndryshe, në seancën e së enjtes Kuvendi i Kosovës do të shqyrtojë disa projektligje nga fusha e ekonomisë ndër to edhe ndryshimet dhe plotësimet në Ligjin për Buxhetin e Kosovës.