Zvicra shqyrton lehtësimin e natyralizimit për sipërmarrësit e huaj

Deputeti Andreas Gafner propozon natyralizim të thjeshtuar për sipërmarrësit e huaj në Zvicër

Deputeti zviceran Andreas Gafner i ka kërkuar këtë javë Këshillit Federal që të shqyrtojë mundësinë e dhënies së të drejtës për një procedurë të thjeshtuar të natyralizimit për disa sipërmarrës të huaj me bazë në Zvicër, përcjell albinfo.ch.

Sipas Gafnerit, masa do të fokusohej kryesisht te pronarët e kompanive nga vendet e Bashkimit Evropian, të cilët gjatë qëndrimit të tyre në Zvicër kanë dhënë një kontribut të dukshëm në ekonomi dhe shoqëri. Ai theksoi se bëhet fjalë për individë që kanë krijuar vende të reja pune, kanë paguar rregullisht taksa dhe kanë kontribuar në zhvillimin ekonomik të vendit.

Deputeti vlerëson se një procedurë e tillë do të ishte një mënyrë për të njohur dhe shpërblyer angazhimin afatgjatë të këtyre sipërmarrësve, si dhe për të forcuar më tej atraktivitetin e Zvicrës si vend për investime dhe inovacion.

Kërkesa e Gafnerit pritet të shqyrtohet nga Këshilli Federal, i cili do të vendosë nëse do të ndërmarrë hapa konkretë drejt ndryshimeve ligjore në këtë drejtim.

---