Edhe 3,185 pako të votimit me postë pritet të mbërrijnë në Kosovë

KQZ: Priten edhe 3,185 pako të votimit me postë

Komisioni Qendror i Zgjedhjeve (KQZ) ka përfunduar numërimin e të gjitha votave me postë që deri më tani kanë arritur në Kosovë, ndërsa procesi ende nuk konsiderohet i mbyllur për shkak të 3,185 pakove të tjera që pritet të sillen sot në vend, përcjell albinfo.ch.

Sipas rezultateve të përmbledhura të publikuara në faqen zyrtare të KQZ-së, Lëvizja Vetëvendosje ka arritur 51.01 për qind të votave, duke siguruar 57 ulëse në Kuvendin e Kosovës.

Pas LVV-së renditet Partia Demokratike e Kosovës me 20.24 për qind të votave dhe 22 ulëse, e ndjekur nga Lidhja Demokratike e Kosovës me 13.26 për qind dhe 15 ulëse. Aleanca për Ardhmërinë e Kosovës ka marrë 5.50 për qind të votave, duke siguruar 5 ulëse në Kuvend.

Zëdhënësi i KQZ-së, Valmir Elezi, ka bërë të ditur se ende nuk kanë mbërritur në Kosovë 3,185 pako me fletëvotime, të cilat janë tërhequr më 2 dhe 5 janar nga kutitë postare në disa qytete evropiane dhe jashtë saj.

“Ende nuk janë sjellë në Kosovë edhe 3,185 pako me fletëvotime, që janë tërhequr më 2 dhe 5 janar nga kutitë postare në Paris (1,962), Berlin (633), Hagë (61), Podgoricë (125) dhe Otavë (404)”, ka deklaruar Elezi të mërkurën.

KQZ-ja pritet të njoftojë për hapat e mëtejmë pas mbërritjes dhe verifikimit të këtyre pakove, para certifikimit përfundimtar të rezultateve të zgjedhjeve.

---