Slloveni: Humb jetën një i ri 28-vjeçar nga Kosova pas një aksidenti të rëndë

pixabay

Një aksident fatal i ndodhur në Slloveni i ka marrë jetën një të riu 28-vjeçar nga Kosova. Viktima është Leun Kastrati, me origjinë nga fshati Turjakë i komunës së Malishevës.

Lajmi për vdekjen e tij është konfirmuar nga faqja zyrtare e fshatit Turjakë, e cila ka shprehur ngushëllime për familjen e të ndjerit, duke bërë të ditur se detajet rreth ceremonisë mortore do të njoftohen më vonë.

Ngjarja tragjike ka ndodhur në autostradën A1, në segmentin mes Lubjanës dhe Mariborit, pranë qytetit Slovenska Bistrica. Sipas raportimeve, një autocisternë e mbushur me karburant ka dalë nga rruga, është përmbysur dhe më pas është përfshirë nga flakët.

Mediat sllovene kanë raportuar gjithashtu për këtë aksident, ku përveç viktimës, dy persona të tjerë kanë mbetur të lënduar.

Policia njofton se aksidenti ka ndodhur rreth orës 08:00 të mëngjesit. Shoferi i autocisternës, i cili po udhëtonte në drejtim të Mariborit, ka humbur kontrollin e automjetit, është përplasur me barrierën ndarëse dhe është përmbysur në korsinë e kundërt, ku është përfshirë edhe një furgon.

Autoritetet po vazhdojnë hetimet për të zbardhur shkaqet e sakta të aksidentit.