Takimi Trump-Zelensky në Davos: Presidenti amerikan kërkon përfundimin e luftës

Trump u tha gazetarëve se beson se pati “një takim të mirë me Zelenskyn”, ndërsa një këshilltar i presidentit ukrainas foli gjithashtu për “bisedime të mira”

Presidenti i SHBA-së, Donald Trump u takua me homologun e tij ukrainas, Volodymyr Zelensky në Davos. Sipas Shtëpisë së Bardhë dhe presidencës ukrainase, takimi mes dy liderëve zgjati rreth një orë.

Axios raporton se presidenti amerikan deklaroi se “lufta në Ukrainë duhet të përfundojë, po vriten shumë njerëz, kryesisht ushtarë”.

Trump u tha gazetarëve se beson se pati “një takim të mirë me Zelenskyn”, ndërsa një këshilltar i presidentit ukrainas foli gjithashtu për “bisedime të mira”, transmeton albinfo.ch.

Presidenti ukrainas mbërriti sot në Davos, ndërsa deri dje takimi me Trumpin nuk ishte konfirmuar përfundimisht. Sipas deklaratave të mëparshme të Zelenskyt, në qendër të bisedimeve pritet të jetë “marrëveshja e prosperitetit” mes Kievit dhe Uashingtonit për Ukrainën e pasluftës.

Më herët gjatë ditës, Trump, duke iu referuar agjendës ndërkombëtare, përsëriti retorikën e tij për përfundimin e luftërave, duke thënë se “kemi paqe në Lindjen e Mesme” dhe se “kemi zgjidhur tetë luftëra”, duke vlerësuar se “një tjetër zgjidhje e konfliktit  po vjen së shpejti”, në lidhje me luftën në Ukrainë.

Siç u shpreh ai, ky ishte një konflikt që “mendova se do të ishte i lehtë”, por që “rezultoi ndoshta më i vështiri”.

Vlen të theksohet se më vonë sot, Jared Kushner dhe Steve Witkoff do të udhëtojnë drejt Moskës për t’u takuar me presidentin rus, Vladimir Putin.

---