A mbron vërtet djathi nga demenca?

(KEYSTONE/Jean-Christophe Bott)

Një studim i madh suedez sugjeron se konsumimi i rregullt i djathit me yndyrë të plotë mund të lidhet me një rrezik pak më të ulët për demencën. Studimi ndoqi rreth 28,000 persona për 25 vjet dhe gjeti se ata që konsumonin më shumë djathë me yndyrë të lartë kishin 13% më pak rrezik për demencë krahasuar me ata që konsumonin më pak, transmeton albinfo.ch.

Megjithatë, studiuesit theksojnë se bëhet fjalë për një lidhje statistikore, jo për një provë shkak-pasojë. Faktorë të tjerë, si aktiviteti fizik, dieta e përgjithshme dhe mjedisi i jetesës, mund të ndikojnë gjithashtu.

Efekti mbrojtës i djathit u vu re kryesisht te personat që nuk kanë gjenin APOE e4, një faktor rreziku për Alzheimer. Zgjidhja nuk është të konsumoni djath pa kufij: studimi sugjeron një konsumin rreth 50 gramë në ditë.

Ekspertët rekomandojnë një dietë të balancuar, ku djathi është pjesë e saj, duke zëvendësuar mishin e përpunuar ose yndyrnat e tjera, dhe duke ndjekur modele ushqimore si dieta mesdhetare. Për trurin, si për shëndetin e përgjithshëm, rëndësi kanë ushqimi i larmishëm, aktiviteti fizik, gjumi i mirë dhe lidhjet sociale.