Ushtarët e Zvicrës festuan në Kosovë me traditat zvicerane

Pika kulmore e mbrëmjes ishte koncerti ushtarak zviceran Small Band - një formacion i vogël i muzikës ushtarake zvicerane

Lidhja me atdheun është e një rëndësie të madhe edhe për anëtarët e SWISSCOY, larg Zvicrës. Të shtunën, 1 gusht, 2015 pjesëtarët e kontingjentit të 32-të të SWISSCOY festuan festën e tyre kombëtare. Për herë të parë ky manifestim u bë në selinë e përgjithshme të kampit të KFOR-it Film City, në Prishtinë, thuhet në një njoftim që për albinfo.ch e ka dhënë Swissint. Në manifestim patën mundësinë të marrin pjesë ushtarë nga vende të ndryshme dhe njëkohësisht të njihen me traditat e Zvicrës.

Pas një dreke të 1 Gushtit për ushtarët zviceranë në fushën e operacioneve, festa u vu në dispozicion për të gjitha kombet. Në arenën e ndërtuar posaçërisht , ushtarët u njohën me një sport tradicional në Zvicër – mundjen. Në një turne të vogël, anëtarë të trupave SWISSCOY, sprovuan aftësitë e tyre në këtë sport tipik zviceran për të zgjedhur në fund edhe fituesin prej tyre. Ndërkaq në tarracën e objektit zviceran të kujdestarisë, shtëpia e Zvicrës, në një mot të përsosur luhej loja me letra – Jass.

Ceremonia e mbrëmjes, në të cilën i tërë kontingjenti SWISSCOY qëndronte në formacion, u ndoq edhe nga ambasadorja e Zvicrës, zonja Krystyna Marty Lang, si dhe zëvendëskomandanti i KFOR-it, brigadieri Anton Valdner (Austri). Komandanti i kontingjentit, kolonel i Shtabit të Përgjithshëm Pascal Eggen dhe brigadieri Peter Wanner, mbajtën fjalimet e tyre me rastin 1 Gushtit, duke falënderuar kështu pjesëtarët e SWISSCOY për angazhimin e tyre në promovimin e shërbimit të paqes.

Ky formacion ditët e fundit pati një turne nëpër Ballkan me ç’rast ka performuar në ambasadat e disa vendeve të Evropës Juglindore. Koncertet më 1 gusht në SWISSCOY dhe më 2 gusht në Prishtinë për ambasadën zvicerane ishin dhe fundi i turneut, thuhet në përfundim të njoftimit.
(SWISSINT)
(Përktheu: Xhevdet Kallaba)

---