Ish-presidentja e Kosovës, Atifete Jahjaga mohon çdo lidhje me dosjen “Epstein”

Ish-presidentja e Kosovës, Atifete Jahjaga, ka publikuar një sqarim lidhur me raportimet mediatike që përmendin emrin e saj në dokumentet e lidhura me Jeffrey Epstein.

Në deklaratën e saj, Jahjaga thekson se raportimet janë “tërësisht të pabaza dhe të pavërteta” dhe se ajo nuk ka pasur kurrë njohje, takim apo kontakt me Epstein. Sipas saj, përmendja e emrit të saj lidhet vetëm me një korrespondencë elektronike të palëve të treta, e cila nuk dëshmon asnjë lidhje personale apo takim me ish-presidenten.

Jahjaga saktëson gjithashtu se emri i saj nuk figuron në asnjë dokument të publikuar, dhe se çdo raportim tjetër përbën “insinuatë dhe mashtrim të opinionit”. Në email-in e referuar përmendet “Presidenti i Kosovës”, por nuk identifikohet se cili dhe nuk ka kërkesa për takim në emër të tij ose të saj.

Ajo kërkon që ky sqarim të publikohet nga mediat që e kanë përmendur, duke theksuar se nuk ka pasur asnjë kontakt me personin në fjalë gjatë karrierës së saj politike.