Jeffrey Epstein kishte interes të blinte vila luksoze në Lucern dhe Zug në Zvicër

Dokumentet e sapo publikuara në lidhje me skandalin e të dënuarit amerikan për abuzim seksual, Jeffrey Epstein (i cili vdiq në moshën 66 vjeç), zbulojnë detaje të panjohura më parë. Sipas tyre, Epstein kishte shfaqur interes për disa prona luksoze në Zvicrën qendrore, përfshirë dy vila në Lucern dhe Zug, raporton gazeta zvicerane Zuger Zeitung, transmeton albinfo.ch.

Në vitin 2010, Epstein mori informacion për pronën “Villa Rose” në Meggen, Lucern, një kompleks prej 10,200 m² buzë Liqenit të Lucernit. Vila përfshinte një shtëpi për anijet, banesa për stafin, park, qasje në liqen, spa, pishinë të brendshme dhe sistem të avancuar mbikëqyrjeje. Ajo i përkiste atëherë tregtarit amerikan të mallrave Marc Rich, i njohur për stilin e tij të shquar dhe i ndarë nga jeta në 2013.

Sipas raportimeve, ekzekutivi i basketbollit amerikan David Stern i kishte ofruar Epstein vilën përmes një emaili, duke shpjeguar se blerja mund të bëhej “shpejt dhe pa agjenci”, pasi ai njihte personalisht Rich. Pyetja e Stern përfundonte me: “Interesuar?” – dhe Epstein duket se kishte shfaqur interes. Megjithatë, disa ditë më vonë, kur ai kërkoi informacion mbi statusin e marrëveshjes, nuk mori asnjë përgjigje. Blerja nuk u realizua kurrë.

Raportohet gjithashtu se Stern i kishte tërhequr vëmendjen Epstein edhe tek një pronë luksoze në kantonin e Zugut, por detajet mbeten të panjohura.

Pas vdekjes së Marc Rich, vila u bleu nga koleksionisti kanadez i artit Robert Landau dhe bashkëshortja e tij Alice në vitin 2014. Landau ka ruajtur shumë nga arredimet origjinale të Rich dhe i ka hapur gazetës Blick dyert e vilës në një vizitë ekskluzive në vitin 2023, duke treguar edhe koleksionin e tij të çmuar të artit. Vila përmban banjo të ndriçuara me ar dhe parket të importuar nga Pallati i Versajës.

Ky informacion vjen ndërkohë që dosjet e Epstein vazhdojnë të zbulojnë lidhje të panjohura të tij me pronarë të pasur, figura politike dhe koleksionistë arti në mbarë botën.