Ambasadori britanik vlerëson rolin e Osmanit në marrëdhëniet Kosovë–Britani

“Vjosa Osmani është një nga arsyet pse Kosova dhe Mbretëria e Bashkuar ruajnë një marrëdhënie të fortë”

Ambasadori i Mbretërisë së Bashkuar në Kosovë, Jonathan Hargreaves ka vlerësuar lart rolin e presidentes Vjosa Osmani në ruajtjen dhe forcimin e marrëdhënieve ndërmjet dy vendeve. Në një intervistë për mediat e Kosovës, ai u shpreh se Osmani është një nga arsyet kryesore pse raportet mes dy shteteve vazhdojnë të jenë të qëndrueshme dhe të fuqishme, përcjell albinfo.ch.

Sipas ambasadorit britanik, bashkëpunimi mes Kosovës dhe Mbretërisë së Bashkuar ka shënuar progres në fusha të ndryshme, duke përfshirë sigurinë, diplomacinë dhe zhvillimin demokratik. Ai theksoi se lidershipi dhe angazhimi institucional i presidentes kanë ndikuar drejtpërdrejt në thellimin e partneritetit strategjik mes dy vendeve.

Ambasadori nënvizoi gjithashtu se marrëdhëniet mes Kosovës dhe Mbretërisë së Bashkuar mbeten një shembull i bashkëpunimit të suksesshëm ndërkombëtar, duke shtuar se Londra do të vazhdojë të mbështesë Kosovën në rrugën e saj drejt integrimeve euroatlantike dhe forcimit të institucioneve demokratike.

Ai përfundoi duke theksuar se bashkëpunimi dhe komunikimi i vazhdueshëm me institucionet e Kosovës, në veçanti me presidencën, kanë ndihmuar në avancimin e agjendave të përbashkëta dhe forcimin e partneritetit afatgjatë mes dy vendeve.

Po ashtu, Jonathan Hargreaves ka vlerësuar marrëdhënien konstruktive me kryeministrin Albin Kurti dhe ka shprehur pritshmëri për të vazhduar bashkëpunimin gjatë mandatit të ri qeverisës.

---