Edhe Arizona njeh zyrtarisht 17 shkurtin si Ditën e Pavarësisë së Kosovës

Ambasada e Kosovës në Uashington ka bërë të ditur se edhe shteti i Arizonas, ka njohur zyrtarisht 17 shkurtin si Ditën e Pavarësisë së Kosovës.

Sipas njoftimit, shteti i Arizonës është i nderuar të qëndrojë pranë shqiptaro-amerikanëve në mbarë shtetin për të përkujtuar 17 shkurtin 2008 si Ditën e Pavarësisë së Kosovës, transmeton albinfo.ch.

“Më 17 shkurt 2008, Republika e Kosovës shpalli zyrtarisht pavarësinë në Prishtinë”, thuhet në njoftim, duke e cilësuar këtë moment si një hap historik të mbështetur në “parimet e sovranitetit dhe vetëvendosjes”, transmeton albinfo.ch.

Përmes njoftimit vlerësohet kontributi i komunitetit shqiptaro-amerikan, ku thuhet se “shqiptaro-amerikanët vazhdojnë të formësojnë strukturën e larmishme shoqërore dhe ekonomike të Arizonës”.

Në përfundim, Guvernatorja Hobbs shpall zyrtarisht 17 shkurtin 2026 si “Dita e Pavarësisë së Kosovës në Arizona”, duke e njohur këtë datë në nivel shtetëror dhe duke riafirmuar mbështetjen për vlerat e lirisë dhe pavarësisë.