Maqedoni: Ish-zëvendëskryeministri Grubi në arrest shtëpiak

Artan Grubi, Facebook

Ish-zëvendëskryeministri i parë i Maqedonisë së Veriut, Artan Grubi, do të qëndrojë në arrest shtëpiak në kuadër të hetimeve për rastin e Lotarisë Shtetërore, ku ai dyshohet të ketë përfshirë edhe pesë persona të tjerë.

Vendimi për zëvendësimin e paraburgimit me arrest shtëpiak u mor pasi mbrojtja e tij kërkoi një masë më të lehtë sigurie, dhe prokuroria e pranonte këtë propozim.

Sipas komunikatës së Prokurorisë Themelore Publike Shkup, i dyshuari i dytë në këtë hetim është paraqitur vullnetarisht pranë organeve të ndjekjes dhe ka shprehur gatishmëri për të bashkëpunuar me institucionet kompetente. Ai ka filluar të shqyrtojë dokumentacionin e çështjes në praninë e prokurorit kompetent dhe kjo procedurë do të vazhdojë edhe në ditët e ardhshme për shkak të vëllimit të madh të materialit provues.

Prokuroria ka propozuar arrest shtëpiak dhe konfiskimin e pasaportës së Grubit, duke argumentuar se pjesa më e madhe e provave është siguruar dhe se ai është paraqitur vullnetarisht.

Mëngjesin e sotëm, Grubi iu dorëzua policisë maqedonase në pikën kufitare Bllacë, ndërsa më shumë se një vit ai ishte i shpallur në kërkim me urdhër arrest ndërkombëtar.