Kurti uron Kosovën pas fitores historike: Botërori kurrë s’ka qenë më afër

Kryeministri Albin Kurti e ka cilësuar triumfin 4:3 ndaj Sllovakisë si një moment historik, duke thënë se ëndrra për kualifikim në Kampionatin Botëror 2026 është më afër se kurrë.

Kryeministri i Kosovës, Albin Kurti, ka uruar Kombëtaren e Kosovës pas fitores dramatike dhe historike ndaj Sllovakisë, në kuadër të gjysmëfinales së plejofit për kualifikim në Kampionatin Botëror 2026, përcjell albinfo.ch.

Kosova triumfoi të enjten mbrëma në Bratislavë me rezultat 4:3, duke siguruar kualifikimin në finalen vendimtare të plejofit, e cila do të zhvillohet të martën në stadiumin “Fadil Vokrri” në Prishtinë, ku “Dardanët” do të përballen me Turqinë.

Në një postim në Facebook, Kurti e cilësoi këtë fitore si një moment të rëndësishëm për futbollin kosovar, duke theksuar se ekipi dhe tifozët kanë hapur një kapitull të ri.

“Urime Kosovës! Urime Dardanëve dhe gjithë shqiptarëve kudo që janë! Ky ekip me këta tifozë sonte ka hapur një kapitull të ri të futbollit te ne. Loja e shkëlqyer dhe realizimet precize do të mbeten të paharrueshme përgjithmonë. Ashtu siç ëndërruam, edhe triumfuam… Kampionati Botëror kurrë s’ka qenë më afër”, ka shkruar Kurti.

Kosova tani është vetëm një hap larg realizimit të ëndrrës për një kualifikim historik në Botëror./Albinfo.ch

---