FFK mobilizon tifozët para finales me Turqinë: Bëhuni zëri i historisë sonte në Fadil Vokrri

FFK me thirrje emocionuese para finales me Turqinë: Sonte nuk është natë për të qëndruar ulur

Federata e Futbollit të Kosovës kërkon mobilizim maksimal në “Fadil Vokrri”, duke i ftuar tifozët të jenë lojtari i 12-të në hapin historik drejt Botërorit 2026, përcjell albinfo.ch.

Federata e Futbollit të Kosovës (FFK) u ka bërë thirrje tifozëve që sonte, në ndeshjen vendimtare ndaj Turqisë në finalen e plejofit për kualifikim në Kupën e Botës 2026, të mos qëndrojnë ulur në tribuna, por të krijojnë një atmosferë të jashtëzakonshme që mund ta shtyjë ekipin drejt historisë.

Përmes një postimi në Facebook, FFK-ja ka theksuar se kjo është një natë e rrallë dhe e papërsëritshme për Kosovën, ku secili tifoz duhet të jetë pjesë aktive e ndeshjes, me zë dhe zemër për kombëtaren.

“Sot nuk është ditë për të qëndruar ulur në tribunat e stadiumit. Nuk është mbrëmje për ta parë ndeshjen si spektatorë të qetë. Sot është momenti kur secili prej nesh duhet të jetë në këmbë, me zërin në maksimum, me zemrën që rreh për një emër të vetëm: Kosovë”, thuhet në thirrjen e Federatës.

FFK-ja ka theksuar se Kosova është vetëm një hap larg realizimit të një ëndrre të madhe – kualifikimit në Botëror – një mundësi që, sipas tyre, mund të vijë vetëm një herë në jetë.

“Jemi vetëm një hap larg Botërorit. Një hap që për shumëkënd ka qenë ëndërr e largët për dekada. Dhe kur historia të troket në derë, nuk hapet me heshtje, hapet me zhurmë, me pasion, me shpirt”, vijon deklarata.

Federata ka bërë të ditur se stadiumi nuk duhet të jetë një vend ku ndeshja përcillet në heshtje, por një arenë ku tifozët shndërrohen në forcën shtytëse të skuadrës.

“Stadiumi nuk është teatër. Nuk ka audiencë pasive. Ka vetëm një rol për të gjithë: të jemi lojtari i dymbëdhjetë. Dardanët në fushë kanë nevojë për atë shtysë që nuk matet me statistika”, thuhet më tej.

FFK-ja ka kërkuar gjithashtu respekt ndaj kundërshtarit, sidomos gjatë intonimit të himnit të Turqisë, por ka bërë thirrje që sapo të nisë loja, stadiumi “Fadil Vokrri” të shndërrohet në një fortesë të vërtetë.

“Por sapo topi të nisë të rrokulliset, stadiumi duhet të shndërrohet në një arenë ku edhe kundërshtari e ndjen peshën e një kombi të tërë”, thuhet në reagim.

Në fund, FFK-ja ka nënvizuar se kualifikimi në Botëror nuk do të ishte vetëm sukses sportiv, por edhe një mundësi e madhe për ta prezantuar Kosovën para botës, duke promovuar identitetin dhe krenarinë kombëtare në skenën më të madhe të futbollit.

“Bileta për në Botëror nuk është vetëm një arritje sportive. Është një mundësi për të treguar Kosovën para botës. Sonte nuk luan vetëm një ekip. Sonte luan një komb i tërë. Beso. Këndo. Brohorit. Sepse sonte, historia mund të shkruhet me zërin tënd”, përfundon thirrja e FFK-së./Albinfo.ch.

---