Kaos në Gotthard: Kolonë 19 kilometra dhe mbi 3 orë pritje drejt jugut

Trafiku në tunelin e Gotthardit është rënduar ndjeshëm për shkak të festave të Pashkëve, punimeve dhe një automjeti të prishur, ndërsa autoritetet paralajmërojnë edhe mbyllje të rrugës alternative për shkak të rrezikut nga ortekët.

Trafiku drejt jugut të Zvicrës ka shënuar një përkeqësim të madh gjatë ditëve të festave të Pashkëve, ku tuneli i Gotthardit është kthyer në një “pikë bllokimi” për mijëra udhëtarë, përcjell albinfo.ch.

Kolona para tunelit të Gotthardit ka arritur deri në 19 kilometra, ndërsa pritjet për kalimin e tunelit kanë shkuar në mbi 3 orë.

Blick raporton se automjetet janë bllokuar deri në zonën e pushimit mes Schattdorf dhe Erstfeld, duke theksuar se një situatë e tillë nuk është parë shpesh në këtë orar gjatë viteve të fundit.

Po ashtu thuhet se shumë udhëtarë ende nuk e kuptojnë seriozitetin e situatës. Një grua ka treguar se navigacioni i saj i shfaqte vetëm 45 minuta pritje, ndërkohë që realisht pritja ishte të paktën trefish më e gjatë, transmeton tutje albinfo.ch.

Shumica e shoferëve janë raportuar të nervozuar dhe të tensionuar, ndërsa vetëm disa turistë të rinj dukeshin më të qetë, pavarësisht bllokadës.

Shkaktarët e bllokimit

Sipas TCS (Touring Club Suisse), shkaktarët kryesorë të kolonave janë:

• punime në tunel,

• kufizim i përkohshëm i gjerësisë së korsive,

• si dhe një automjet i prishur brenda tunelit, që në një moment ka shkaktuar edhe mbyllje të plotë të tunelit në të dy drejtimet.

Në orët e hershme të mëngjesit (rreth 05:50), tuneli u raportua i bllokuar plotësisht, duke rritur kolonën sërish në 12 kilometra, me rreth 2 orë pritje.

Rrugët alternative të rekomanduara

Autoritetet rekomandojnë si rrugë alternative:

• A13 përmes tunelit San Bernardino,

• për udhëtarët drejt Italisë edhe rrugët:

• A9 Simplon / Grosser St. Bernhard,

• ose transporti me tren përmes Lötschberg.

Paralajmërim për mbyllje të rrugës Gotthard

Ndërkohë, Kanton Uri ka paralajmëruar se rruga Gotthard mes Amsteg dhe Wassen do të mbyllet nga e shtuna deri të martën, nga ora 13:00 deri 19:00, për shkak të rrezikut të ortekëve të borës së lagësht.

Mbyllja vjen si pasojë e rritjes së madhe të temperaturave të parashikuara për ditët në vijim, ndërsa segmenti më i rrezikuar konsiderohet Wilerplanggä, mes Gurtnellen dhe Wassen.

Kjo rrugë përdoret shpesh si alternativë kur autostrada A2 është e mbingarkuar, çka pritet ta rëndojë edhe më shumë situatën në ditët në vijim.

Autoritetet bëjnë të ditur se dalja e autostradës në Wassen do të mbetet e hapur dhe rajoni Urserntal do të jetë i qasshëm për banorët dhe vizitorët.

Vlen të theksohet se situata në Gotthard pritet të mbetet kritike gjatë gjithë fundjavës së Pashkëve, ndërsa shoferët këshillohen të planifikojnë udhëtimin me kujdes dhe të përdorin rrugë alternative./Albinfo.ch

---