Miratohet Projektligji për çmimet tavan në Kosovë

Kurti thotë se ligji synon të ndalë rritjen artificiale të çmimeve dhe të mbrojë qytetarët nga abuzimet gjatë krizave.

Qeveria e Kosovës ka miratuar sot Projektligjin për masat e përkohshme për produktet themelore, i njohur si Projektligji për çmimet tavan, me qëllim të parandalimit të rritjes së pajustifikuar të çmimeve në treg, përcjell albinfo.ch.

Kryeministri i Kosovës, Albin Kurti, deklaroi se ky projektligj nuk ka për qëllim ndërhyrjen në tregun e lirë, por synon të mbrojë qytetarët nga rritjet artificiale të çmimeve dhe keqpërdorimet që mund të ndodhin në emër të krizave.

“Po e ri-sjellim për miratim këtë projektligj që vjen si përgjigje e domosdoshme ndaj një realiteti që qytetarët tanë e kanë përjetuar: rritjen e papritur të çmimeve, paqartësi në treg dhe mungesë të mekanizmave efektiv për mbrojtje. Me këtë projektligj ne nuk po hyjmë në tregun e lirë, por përkundrazi po e mbrojmë lirinë e tregut nga abuzimi”, tha Kurti.

Ai shtoi se projektligji synon të krijojë një balancë ndërmjet funksionimit të tregut të lirë dhe përgjegjësisë së shtetit për mbrojtjen e interesit publik në situata të jashtëzakonshme.

Sipas Kurtit, ligji parasheh mekanizma të qartë për ndërhyrje të përkohshme pa shkaktuar deformime afatgjata në treg, duke garantuar furnizim dhe çmime të përballueshme për produktet bazë në periudha krizash.

“Ky projektligj parandalon spekulimet dhe fitimet e pajustifikuara në kurriz të qytetarëve dhe siguron reagim të shpejtë institucional kur tregu destabilizohet”, u shpreh ai.

Ky projektligj ishte miratuar më herët edhe në Kuvendin e Kosovës, por ishte dërguar nga opozita në Gjykatën Kushtetuese, e cila e kishte shpallur antikushtetues ligjin për çmimet tavan.

Qeveria e Kosovës ka bërë të ditur se këtë herë projektligji është rikthyer për miratim me plotësimet e nevojshme, në përputhje me vendimin e Kushtetueses./Albinfo.ch

---