Njëmbëdhjetë persona hospitalizohen pasi zjarri përfshin një ndërtesë shumëkatëshe në Tiranë

Zjarr në një pallat shumëkatësh në Tiranë, 11 persona përfundojnë në spital

Një zjarr i madh ka përfshirë të martën një ndërtesë shumëkatëshe banimi në kryeqytetin e Shqipërisë, Tiranë, duke shkaktuar lëndime që çuan në hospitalizimin e 11 personave, sipas njoftimeve zyrtare, përcjell albinfo.ch.

Drejtori i Urgjencës Kombëtare, Skënder Brataj, deklaroi se personat e dërguar në spital nuk janë në rrezik për jetën.

Ndërkohë, Agjencia për Media dhe Informim e Qeverisë shqiptare (MIA) njoftoi se mes të lënduarve janë gjashtë zjarrfikës dhe dy qytetarë, të cilët kanë marrë trajtim mjekësor.

“Konkretisht, u transportuan drejt spitalit 3 zjarrfikës me djegie të shkallës së dytë, 2 zjarrfikës me simptoma asfiksie, si dhe 2 qytetarë të evakuuar nga objekti”, thuhet në njoftimin e MIA-s.

Zjarri shpërtheu rreth orës 17:00, në një ndërtesë pranë Qendrës Spitalore Universitare “Nënë Tereza”, ndërsa u vu nën kontroll rreth tre orë më vonë.

Sipas autoriteteve, fasada e pallatit u përfshi tërësisht nga flakët deri në katin e 12-të, ndërsa zjarri depërtoi edhe në disa banesa, pavarësisht ndërhyrjes së shpejtë të zjarrfikësve.

Shkaku i zjarrit ende nuk dihet./Albinfo.ch

---