Italia në krye të Evropës për eliminimin e hepatitit C, objektiv ambicioz deri në vitin 2030

Italia po synon të eliminojë hepatitin C deri në vitin 2030 dhe aktualisht konsiderohet një nga vendet udhëheqëse në Evropë në këtë fushë.

Sipas ekspertëve të shëndetësisë, suksesi i vendit lidhet me zbatimin e një strategjie të quajtur “mikro-eliminim”, e cila fokusohet në zbulimin e hershëm të rasteve përmes kontrollit sistematik në spitale. Në këtë kuadër, testi për hepatitin C (HCV) është përfshirë në analizat rutinë të gjakut gjatë trajtimeve mjekësore.

Profesori Emanuele Nicastro thekson se kjo qasje është praktike dhe efikase, pasi ndihmon në identifikimin e infeksioneve të padiagnostikuara dhe mundëson fillimin e shpejtë të trajtimit. Kjo ul ndjeshëm rrezikun e komplikimeve të rënda si cirroza dhe kanceri i mëlçisë.

Në pesë vitet e fundit, në Itali janë kryer mbi 3.1 milionë teste për hepatitin C, duke zbuluar më shumë se 19 mijë raste aktive. Po ashtu, rreth 4 mijë persona që nuk kishin faktorë të njohur rreziku janë dërguar në trajtim, gjë që tregon se shumë raste mbeten ende të padiagnostikuara.

Këto të dhëna u prezantuan në një konferencë të organizuar nga Instituti i Lartë i Shëndetësisë në bashkëpunim me Ministrinë e Shëndetësisë në Itali, ku u diskutua forcimi i bashkëpunimit në luftën kundër hepatiteve virale dhe sëmundjeve të mëlçisë.