Ministrja zvicerane: Emigrantët janë “thelbësorë” për financimin e pensioneve shtetërore

Elisabeth Baume-Schneider thekson se kontributet e të huajve janë vendimtare për stabilitetin e sistemit të sigurimeve sociale në Zvicër

Ministrja e Brendshme e Zvicrës, Elisabeth Baume-Schneider, ka deklaruar se kontributet e emigrantëve janë thelbësore për financimin e sistemit shtetëror të pensioneve në vend, përcjell albinfo.ch.

Në një intervistë për “Tribune de Genève”, ajo theksoi se në përgjithësi popullsia zvicerane merr më shumë përfitime nga pensionet shtetërore sesa që kontribuon në sistem, ndërsa situata është e kundërt për shtetasit e huaj, të cilët kontribuojnë më shumë sesa marrin mbrapsht.

Baume-Schneider i bëri këto komente në përgjigje të argumenteve të Partisë Popullore Zvicerane (SVP), e cila në kuadër të fushatës së saj “Jo për 10 milionë banorë” ka pretenduar se të huajt përbëjnë barrë për sistemin e sigurimeve sociale.

Ministrja theksoi se këto të dhëna e kundërshtojnë këtë narrativë, duke nënvizuar rolin e rëndësishëm të emigrantëve në qëndrueshmërinë financiare të sistemit pensional në Zvicër. /Albinfo.ch

---