Kosovë: KEDS-i dënohet sërish për parregullsi në njehsorë, me 35 mijë euro

Foto FB: Ministria e Industrisë, Ndërmarrësisë, Tregtisë dhe Inovacionit

KEDS-i është dënuar sërish nga Ministria e Industrisë, Ndërmarrësisë, Tregtisë dhe Inovacionit në Kosovë pas parregullsive të konstatuara në njehsorët elektrik, kësaj here me 35 mijë euro.

Sipas njoftimit, Agjencia e Metrologjisë së Kosovës pas verifikimit laboratorik të 16 njehsorëve elektrikë të konsumatorëve që kanë paraqitur ankesa, janë konstatuar një sërë parregullsish për çka është shqiptuar edhe dënimi, teksa sipas rezultateve të verifikimit, në 6 raste është konstatuar se njehsorët elektrikë kishin afat të skaduar të verifikimit, ndërsa në 6 raste të tjera janë evidentuar devijime në orë dhe datë.

Po ashtu, në një rast është konstatuar heqje e miratimit të tipit të njehsorit elektrik, ndërsa 3 njehsorë të tjerë vazhdojnë të jenë në procedurë të verifikimit laboratorik.

“Bazuar në këto gjetje, Inspektorati Qendror i Mbikëqyrjes së Tregut (IQMT) ka shqiptuar gjobë ndaj KEDS-it në vlerë prej 35 mijë eurosh”, thuhet në njoftimin e ministrisë, transmeton albinfo.ch.

Ndryshe, kjo është gjoba e katërt ndaj KEDS-it, pasi fillimisht është dënuar me 6 mijë euro për dy njehsorë me afat të skaduar, e më pas edhe me 30.000 euro për gjashtë njehsorë me afat të skaduar të vlefshmërisë dhe me 90 mijë euro për herë të tretë.