Osmani, bartëse e listës së LDK-së për zgjedhjet e 7 qershorit

Lumir Abdixhiku konfirmon garimin e përbashkët në zgjedhjet e 7 qershorit, ndërsa Kryesia e LDK-së e ka mbështetur propozimin në tërësi.

Kryetari i Lidhjes Demokratike të Kosovës, Lumir Abdixhiku, ka zyrtarizuar kandidaturën e tij si i propozuar i LDK-së për kryeministër në zgjedhjet parlamentare të 7 qershorit, përcjell albinfo.ch.

Gjatë fjalimit të tij në Këshillin e Përgjithshëm të partisë, Abdixhiku konfirmoi gjithashtu se ka propozuar që LDK të garojë në një listë të përbashkët me Vjosa Osmanin, të cilën e ka propozuar si kandidate për Presidente të Republikës, njëkohësisht edhe bartëse e listës zgjedhore.

“Në këtë propozim timin, kam propozuar garim të përbashkët për President të Republikës dhe për Kryeministër të Republikës”, deklaroi Abdixhiku.

Ai theksoi se ka propozuar që LDK të hyjë në garë me Vjosa Osmanin për presidente dhe me të si kandidat për kryeministër, duke shtuar se ky propozim është mbështetur dhe votuar në plotni nga Kryesia e LDK-së.

Ndërkohë, para nisjes së mbledhjes së Këshillit të Përgjithshëm, Abdixhiku u shpreh se kjo është një ditë e rëndësishme për partinë dhe se synimi i tij është bashkimi i të gjitha strukturave brenda LDK-së.

“Sot është ditë e madhe për LDK-në, të gjithë do t’i bëjmë bashkë”, u shpreh ai.

LDK pritet që në mbledhjen e sotme të diskutojë dhe të marrë vendim përfundimtar lidhur me përfshirjen e Vjosa Osmanit në listën zgjedhore të partisë, marrëveshje e cila sipas Abdixhikut duhet të miratohet edhe nga Këshilli i Përgjithshëm për t’u zyrtarizuar.

Disa ditë më parë, Kryesia e LDK-së kishte dhënë mbështetjen fillestare për këtë bashkëpunim, ndërsa Abdixhiku në një postim në Facebook u kishte bërë thirrje anëtarëve për unitet, duke theksuar se synon të bashkojë të gjitha grupet brenda partisë, përfshirë ata që kanë qëndruar, ata që janë larguar dhe ata që vazhdojnë të besojnë në LDK./Albinfo.ch

---