Abdixhiku: Bashkimi i LDK-së është “antidot” për krizën politike, Osmani bartëse e listës

Kryetari i LDK-së konfirmon se do të garojë për kryeministër në zgjedhjet e 7 qershorit dhe thotë se partia po del me “ofertë të plotë” para qytetarëve

Kryetari i Lidhjes Demokratike të Kosovës (LDK), Lumir Abdixhiku, ka deklaruar se bashkimi i partisë për zgjedhjet e 7 qershorit është “antidot” për gjendjen politike në të cilën, sipas tij, ka rrëshqitur Kosova. Ai konfirmoi se Kryesia e LDK-së e ka mbështetur propozimin që ish-presidentja Vjosa Osmani të jetë bartëse e listës zgjedhore, ndërsa njëkohësisht do të prezantohet edhe si kandidate për presidente, përcjell albinfo.ch.

Abdixhiku bëri të ditur se ai vetë do të jetë kandidat për kryeministër, duke thënë se procesi i bashkimit nuk ka të bëjë me interesa personale apo kalkulime elektorale, por me përgjegjësi politike ndaj shtetit.

“Askush nuk e ka luksin e hatërmbetjeve. Askush nuk ka të drejtë ta vendosë veten mbi nevojën që ka Republika për një LDK të fortë”, u shpreh Abdixhiku gjatë fjalimit në Këshillin e Përgjithshëm të LDK-së, ku pritet të merret vendimi përfundimtar për bashkimin me Osmanin.

Ai theksoi se LDK synon të garojë me një listë të përbashkët, duke e cilësuar këtë si përpjekje për rikthimin e ekuilibrit institucional dhe stabilitetit politik në vend.

Sipas Abdixhikut, Kosova po shkon në zgjedhje jo për shkak të mungesës së shumicës parlamentare, por për shkak të moszgjedhjes së presidentit, të cilin e cilësoi si thelbin e krizës aktuale.

“Kosova nuk po shkon në zgjedhje për mungesën e shumicës, për shkak të moszgjedhjes së presidentit. Ky është thelbi i krizës sonë aktuale… Para se të ketë qeveri të re, Kosova duhet të ketë president të ri”, deklaroi ai.

Ai shtoi se qytetarët kanë të drejtë të dinë jo vetëm kush synon të qeverisë, por edhe kush synon të përfaqësojë shtetin si presidente, duke thënë se LDK po del para votuesve me një “ofertë të plotë”.

Abdixhiku kritikoi edhe gjendjen e zgjatur të ushtruesve të detyrës në institucione, duke vlerësuar se kjo po e dëmton funksionimin normal të shtetit. Ai theksoi se LDK ka qenë konstruktive dhe ka ofruar alternativa për stabilitet institucional, por, sipas tij, përballë ka pasur një qasje që nuk ka kërkuar zgjidhje.

“LDK-ja mbajti qëndrim konstruktiv, ofroi alternativa dhe ishte e gatshme për marrëveshje politike”, potencoi ai.

Ndërkohë, i pyetur për rikthimin e ish-ministrit Agim Veliu, Abdixhiku u përgjigj shkurt, duke thënë se synimi i tij është bashkimi i të gjithëve brenda partisë.

“Të gjithë do t’i bëjmë bashkë”, u shpreh ai para hyrjes në sallën ku mbahet mbledhja e Këshillit të Përgjithshëm.

LDK pritet që gjatë ditës të marrë vendim për bashkimin zgjedhor me Vjosa Osmanin, në kuadër të përgatitjeve për zgjedhjet parlamentare të 7 qershorit./Albinfo.ch

---