OBSH: Hantavirusi nuk është aspak i njëjtë me Covid-19

@unsplash

Evakuimi i rreth 150 pasagjerëve të anijes turistike MV Hondius, e prekur nga një shpërthim i hantavirusit në Tenerife, po zhvillohet nën masa të rrepta sigurie, ndërsa Organizata Botërore e Shëndetësisë (OBSH) ka qetësuar opinionin publik duke theksuar se situata nuk ka ngjashmëri me pandeminë e COVID-19.

“Hantavirusi nuk është aspak i njëjtë me Covid-in,” deklaroi Sylvie Briand, shkencëtare kryesore e OBSH-së, duke nënvizuar se bëhet fjalë për një virus me karakteristika krejtësisht të ndryshme dhe me rrezik shumë më të kufizuar të transmetimit mes njerëzve.

Sipas saj, ndryshe nga koronavirusi, hantavirusi është kryesisht me origjinë shtazore dhe transmetimi nga njeriu te njeriu kërkon kontakte shumë të ngushta, çka e bën rrezikun e përhapjes masive dukshëm më të ulët.

Megjithatë, autoritetet shëndetësore po zbatojnë masa të kujdesshme, përfshirë evakuimin në grupe të vogla, izolimin e mundshëm të rasteve dhe monitorim të vazhdueshëm të pasagjerëve, për shkak të periudhës së inkubacionit të virusit.

OBSH thekson se, pavarësisht situatës së pazakontë në një anije, nuk ka indikacione për një krizë të ngjashme me COVID-19, por vigjilenca mbetet e domosdoshme deri në përfundimin e plotë të monitorimit.