Kurti në forumin Itali–Kosovë për agro-biznes: Kosova e gatshme për investime dhe partneritete afatgjata

Në një forum ekonomik në fushën e agro-ushqimit, zyrtarët e Kosovës dhe Italisë theksuan potencialin e bashkëpunimit dhe rritjen e investimeve ndërmjet dy vendeve.

Kryeministri në detyrë i Albin Kurti ka deklaruar se Kosovo ofron stabilitet makroekonomik, sistem financiar të qëndrueshëm dhe një klimë gjithnjë e më të favorshme për investime të huaja, përcjell albinfo.ch.

Gjatë fjalës së tij në forumin Itali–Kosovë për agro-biznes, Kurti theksoi se vendi ka rritur eksportet, ka përmirësuar ambientin e biznesit dhe po tërheq investime të reja, duke u mbështetur në potencialin e një popullsie të re dhe sipërmarrëse.

Sipas tij, takimet biznes-me-biznes (B2B) në këtë forum do të ndihmojnë në krijimin e partneriteteve konkrete ndërmjet kompanive kosovare dhe italiane, jo vetëm në sektorin agro-industrial, por edhe më gjerë.

Ministrja në detyrë e Industrisë, Ndërmarrësisë dhe Tregtisë, Mimoza Kusari-Lila, tha se pjesëmarrja e sipërmarrësve italianë tregon interes të qartë për bashkëpunim afatgjatë ekonomik dhe investime të reja në Kosovë.

Ndërkohë, ministri në detyrë i Bujqësisë, Armend Muja, u shpreh se Kosova synon zhvillimin e modeleve moderne të bujqësisë, me fokus të veçantë në prodhimin organik dhe përpunimin ushqimor.

Ambasadorja e Kosovës në Itali, Nita Shala, theksoi se vendi ka potencial të madh në sektorin agro-ushqimor, duke përfshirë tokën pjellore, prodhuesit vendorë dhe një brez të ri sipërmarrësish të orientuar drejt standardeve evropiane.

Nga ana tjetër, ambasadori i Italisë në Kosovë, Maurizio Antonini, vlerësoi forumin si dëshmi të partneritetit strategjik mes dy vendeve dhe theksoi rëndësinë e sektorit agro-ushqimor në marrëdhëniet tregtare Kosovë–Itali.

Sipas të dhënave të prezantuara, Italia mbetet një nga partnerët kryesorë tregtarë të Kosovës, me një shkëmbim të përgjithshëm tregtar që arrin qindra milionë euro dhe me sektorin ushqimor që zë një peshë të konsiderueshme në këto marrëdhënie./Albinfo.ch

---