Cyrihu dhe Gjeneva, çmimet dhe pagat më të larta në botë

Qytetet më të shtrenjtë janë Cyrihu Gjeneva dhe Nju Jorku ndërsa të ardhurat më të larta i marrin të punësuarit në Cyrih, Gjenevë dhe Luksemburg

Qytetet zvicerane:  Cyrihu dhe Gjeneva, krahas Nju Jorkut amerikan, janë qytetet  më te shtrenjtë  në botë. Por duke qenë se në Cyrih e në Gjenevë sikur në gjithë Zvicrën edhe pagat janë më të lartat, atëherë edhe fuqia blerëse në keto qytete është më e madhja.

Si masë për vlerësimin e shtrenjtësisë së jetës dhe fuqisë blerëse në qytetet përkatëse është marrë shporta standarde prej 122 artikujsh e shërbimesh dhe paga mesatare.

Të ardhurat më të larta i marrin të punësuarit në Cyrih, Gjenevë dhe Luksemburg. Ndërsa në qytetet si Nairobi, Jakarta dhe Kiev, që janë në fund të listës, të ardhurat janë sa 5 përqindëshi (ose 20 fish më të ulëta)  i atyre në Cyrih.

Edhe sa i përket pagës mesatare neto  Luksemburgu, Cyrihu dhe Gjeneva mbeten në krye të listës  pasi që me to mund të blihen më së shumti artikuj dhe shërbime, sipas shportës standarde.

Me shembuj praktikë kjo duket kështu: Një të punësuari në Cyrih ose në Gjenevë i nevojiten vetëm 11 minuta punë për të fituar paratë që i duhen për ta blerë një “big mac”, shkruan nzz.ch. Por në këtë pikë zviceranëve ua kalojnë të punësuarit në Hong Kong: atyre u duhen vetëm 9 minuta punë për të blerë këtë artikull ushqimor.

Nga ana tjetër, në Nairobi një big mac “kushton” afër 3 orë punë (18 herë më shumë se në qytetet e përmendura më parë),  merret vesh nga një studim i realizuar nga banka UBS.

Një shembull tjetër krahasimi është marrë blerja e një telefoni iPhone 6. Një punëtor nga Cyrihu duhet të punojë 21 orë ndërsa një kolegu të tij nga Kievi i duhen 30 herë më shumë ose mbi 600 orë punë për ta blerë iPhonin e njëjtë.