SHBA përfundon valën e fundit të sulmeve ushtarake ndaj Iranit

CENTCOM njofton se u goditën dhjetëra objektiva ushtarake, përfshirë infrastrukturën logjistike, mbrojtjen ajrore dhe kapacitetet detare.

Komanda Qendrore e Shteteve të Bashkuara (CENTCOM) ka njoftuar përfundimin e valës së fundit të sulmeve ushtarake kundër Iranit, pas gjashtë netëve radhazi të operacioneve, përcjell albinfo.ch.

Sipas deklaratës së CENTCOM-it, gjatë operacionit u përdorën aeroplanë luftarakë, dronë dhe anije luftarake për të goditur dhjetëra objektiva ushtarake iraniane. Sulmet përfunduan në orët e para të mëngjesit.

Objektivat e goditura përfshinin sisteme të mbikëqyrjes bregdetare, pozicione të mbrojtjes ajrore, infrastrukturë logjistike ushtarake dhe kapacitete detare.

Më herët ishte raportuar se forcat amerikane kishin goditur edhe dy ura në jug të Iranit, të cilat, sipas vlerësimeve të Uashingtonit, shërbenin si pjesë e infrastrukturës logjistike ushtarake.

Me përfundimin e kësaj vale sulmesh, mbyllet nata e gjashtë radhazi e operacioneve ushtarake amerikane kundër Iranit, në një periudhë tensionesh të larta në Lindjen e Mesme./Albinfo.ch

---