Virusi i Nilit Perëndimor po zgjerohet në Evropë, Greqia regjistron 21 raste të infektimit

@pixabay

Sezoni i përhapjes së virusit të Nilit Perëndimor ka nisur në disa vende evropiane, ku janë evidentuar raste të transmetimit lokal në Greqi, Itali, Spanjë, Rumani dhe Maqedoninë e Veriut. Të dhënat e Qendrës Evropiane për Parandalimin dhe Kontrollin e Sëmundjeve (ECDC) tregojnë se virusi po shfaqet edhe në zona të reja, duke rritur kujdesin e autoriteteve shëndetësore.

Në Greqi, Organizata Kombëtare e Shëndetit Publik (EODY) ka bërë të ditur se deri më 22 korrik janë konfirmuar 21 raste me virusin e Nilit Perëndimor. Shumica e të prekurve kanë zhvilluar komplikacione të rënda që prekin sistemin nervor qendror, përfshirë encefalitin, meningjitin dhe paralizën akute. Vetëm një pacient ka pasur simptoma më të lehta.

Deri tani nuk është regjistruar asnjë humbje jete, ndërsa 13 persona po marrin trajtim në spital. Gjatë javës së fundit janë konfirmuar 14 raste të reja.

Italia paraqitet si vendi me numrin më të lartë të rasteve, me 20 infektime të raportuara në 16 zona të ndryshme. Ndërkohë, në Maqedoninë e Veriut janë zbuluar dy raste në rajonet e Shkupit dhe Vardarit, ndërsa nga dy raste janë konfirmuar edhe në Rumani dhe Spanjë.

Në Greqi, pjesa më e madhe e infektimeve është përqendruar në rajonin e Atikës, kryesisht në zonat Spata-Artemida, Markopulo Mesogaias, Pallini dhe Agia Paraskevi. Raste sporadike janë evidentuar edhe në Larisa dhe Palamas.

Autoritetet greke kanë identifikuar disa zona të tjera si me rrezik të shtuar, edhe pse deri tani nuk janë raportuar raste te njerëzit.

Sipas EODY, prania e virusit pothuajse çdo vit që nga viti 2010 tregon se ai është tashmë i përhapur në mënyrë të qëndrueshme në Greqi, një fenomen i ngjashëm me atë që ndodh edhe në disa vende të tjera evropiane.

Ekspertët shpjegojnë se përhapja e virusit lidhet me faktorë si kushtet klimatike, shtimi i popullatës së mushkonjave dhe lëvizja e zogjve të egër, të cilët konsiderohen bartës natyrorë të infeksionit.

Autoritetet shëndetësore u kanë bërë thirrje qytetarëve të marrin masa mbrojtëse ndaj pickimeve të mushkonjave, duke rekomanduar përdorimin e rrjetave mbrojtëse, veshjeve që mbulojnë trupin dhe eliminimin e ujërave të ndenjura pranë banesave.

Specialistët theksojnë se nuk mund të parashikohet me saktësi se cilat zona do të preken më shumë gjatë këtij sezoni, ndaj masat parandaluese mbeten të nevojshme në të gjitha zonat.