Euro drejt ndryshimit, BQE prezanton modelet e reja të kartëmonedhave

Qytetarët e Bashkimit Evropian do të kenë mundësi të japin mendimin e tyre për dizajnin e ri deri më 21 shtator.

Banka Qendrore Evropiane (BQE) ka prezantuar këtë të enjte propozimet për dizajnin e serisë së re të kartëmonedhave euro, duke nisur një konsultim publik ku qytetarët e Bashkimit Evropian mund të shprehin mendimin e tyre deri më 21 shtator 2026, transmeton albinfo.ch.

Modelet e përzgjedhura janë rezultat i një konkursi mbarëevropian, në të cilin morën pjesë më shumë se 1,200 dizajnerë grafikë.

Seria e re do të shënojë ridizajnimin e parë të plotë të kartëmonedhave euro që nga futja e tyre në qarkullim në vitin 2002. Megjithatë, kartëmonedhat aktuale do të vazhdojnë të jenë të vlefshme dhe do të qarkullojnë paralelisht me ato të rejat.

Mes propozimeve të përzgjedhura janë figura të njohura të historisë dhe kulturës evropiane, si shkencëtarja Marie Skłodowska-Curie, kompozitori Ludwig van Beethoven dhe artisti Leonardo da Vinci.

Një tjetër koncept i dizajnit është i përqendruar te natyra, duke paraqitur specie të ndryshme shpendësh, përfshirë lejlekun e bardhë dhe zogj të tjerë karakteristikë të Evropës.

Sipas BQE-së, përveç pamjes së re, kartëmonedhat do të prodhohen me materiale dhe procese më të qëndrueshme, me synim uljen e ndikimit në mjedis dhe rritjen e jetëgjatësisë së tyre.

Vendimi përfundimtar mbi dizajnin e ri të kartëmonedhave euro pritet të merret nga Këshilli Drejtues i Bankës Qendrore Evropiane në fund të këtij viti./Albinfo.ch

---