Rrjetëzohen bizneset shqiptare në Norvegji

Pas Rrjetit të bizneseve shqiptare në Suedi, Ministria e Diasporës dhe Rrjeti i bizneseve të diasporës shqiptare e vazhduan procesin e krijimit të rrjetit të bizneseve shqiptare edhe në Norvegji.

Sipas një nkoftimi të MeD-it thuhet se para krijimit të rrjetit, u mbajt një takim parapërgatitor me përfaqësuesit e bizneseve shqiptare në Norvegji, si dhe u vizituan bizneset më të suksesshme në Oslo dhe në rrethinën e saj, si: “Istogu Hustenger”, “Rema 1000”, “Soli Renhold Vedlikehold AS”, “Top Maler Bygg LTD”.

“Konstatimi i nxjerrë nga këto takime, ku u diskutua për sfidat dhe sukseset e tyre, si dhe për rëndësinë e komunikimit midis tyre, ishte se mekanizmi më i përshtatshëm është rrjetëzimi.

Kështu, më 1 tetor, në Oslo, u mbajt Forumi për themelimin e Rrjetit të bizneseve shqiptare në Norvegji”, thuhet në njoftim përcjell albinfo.ch.

Në këtë forum ishte i pranishëm edhe sekretari i përgjithshëm i MeD-së, Osman Shahini.

Ai i informoi të pranishmit edhe për rëndësinë e regjistrit të diasporës.

Naim Dedushaj, drejtor i Departamentit të Investimeve të Diasporës, nikoqir i projektit, foli rreth projektit, qëllimi i të cilit është përafrimi i bizneseve dhe i biznesmenëve shqiptarë në botë dhe bashkëpunimi mes tyre që, nëpërmjet projekteve të përbashkëta, të investojnë në trojet shqiptare. Gjithashtu, ai potencoi rëndësinë që kanë këto rrjete, rezultatet e rrjetëzimit në 18 shtete të botës, etj.

Në anën tjetër, Besian Mustafa, drejtor i përgjithshëm i KIESA-s, i njoftoi afaristët e pranishëm rreth pakos së re fiskale.

Po ashtu, në forum ishin të pranishëm edhe kryetari i Rrjetit të bizneseve në Finlandë, z.Omer Nura, kryetarja e posazgjedhur znj. Saranda Iseni dhe përfaqësuesit e projektit DEED , të UNDP-së dhe ata të IOM-it.

Në fund të forumit, u zgjodh edhe kryesia prej 11 anëtarësh.

Kryetar u zgjodh Korab Thaci, nënkryetarë Albin Istogu dhe Agim Thaqi, sekretare Liridona Gashi, dhe arkëtar Habil Kaloshi.

 

 

 

 

 

---