Kosova kalon fazën e parë të anëtarësimit në UNESCO

Republika e Kosovës kalon fazën e parë të përfaqësimit në UNESCO, pasi që Këshilli Ekzekutiv voto rekomandimet për anëtarësimin e këtij shteti në këtë institucion

Këshilli Ekzekutiv i UNESCO-s ka votuar rekomandimin për anëtarësim të Republikës së Kosovës në UNESCO. Me këtë rast Kosova sot kalon fazën e parë të përfaqësimit në këtë institucion, ndërsa faza vendimtare mbetet votimi nga asambleja e UNESCO-së, që mbahet muajin tjetër.

Fillimisht votimi për Kosovën ishte shtyrë pasi që Rusia dhe Kuba kërkuan këtë, mirëpo pas rekomandimin që Shqipëria ka dhënë për ta anëtarësuar Kosovën në UNESCO, ka vazhduar votimi. Në votimin e mbajtur sot, Kosova ka marrë 27 vota pro, 14 kanë qenë kundër dhe 14 kanë abstenuar.

Anëtarësimi në UNECSO e bënë përgjegjës secilin vend anëtar për trashëgiminë që ndodhet në territorin e tij.

Ka disa muaj që ka filluar një fushatë e ashpër në diplomaci kundër dhe pro anëtarësimit të Kosovës në UNESCO. Serbia ka lobuar me të gjitha forcat kundër Kosovës, ndërsa Prishtina zyrtare së bashku me shtete e saj aleate, ka lobuar për anëtarësimin e Kosovës në këtë institucionin ndërkombëtarë.

Zëvendëskryeministri i Kosovës, Hashim Thaçi, nëpërmjet një postimi në Facebook ka thënë se aprovimi i Rezolutës që rekomandon pranimin e Kosovës në UNESCO është një hap shumë i madh për Kosovën. “Komiteti Ekzekutiv i UNESCO-s sapo aprovoi Rezolutën që rekomandon pranimin e Republikës së Kosovës në UNESCO. Një hap shumë i madh përpara për Kosovën”, ka shkruar Thaçi.