Spitali shndërrohet në qendër federale të azilit

Në këtë qendër do të strehohen duke filluar nga viti i ardhshëm rreth 350 azilkërkues

Ish spitali “Zieglerspital” i Bernës është shndërruar përkohësisht në qendër federale të azilit. Ekzekutivi i qytetit të Bernës ka vendosur që këtë ndërtesë t`ia japë në dispozicion për dhjetë vite Sekretariatit Federal për Migracion.

Në këtë qendër do të strehohen duke filluar nga viti i ardhshëm rreth 350 azilkërkues, ka thënë drejtorja për çështje sociale në ekzekutivin e Bernës, Franziska Teuscher në një takim që ka pasur me popullatën lokale.

Por një numër azilkërkuesish pritet që të vendosen aty edhe gjatë muajve të mbetur të vitit 2015.

Pasi të kalojë periudha dhjetëvjeçare në arealin e spitalit do të ndërtohen banesa dhe lokale për zyra ndërsa planifikimi dhe ndërtimi i tyre pritet të zgjasë në mes 5 dhe 8 viteve.

Ndryshe nga qendrat tjera të azilit që po priten me rezerva dhe me rezistencë, kjo e fundit ka hasur në një pritje të ngrohtë të banorëve lokalë. Në lagjen përreth ndërtesës që po shndërrohet në qendër azili, banojnë kryesisht intelektualë, artistë dhe punëtorë arsimorë, vënë në dukje mediet zvicerane.