Enis Alushi bëhet baba dhe drejt e në përfaqësuesen e Kosovës

Çifti futbollistik Enis dhe Fatmire Alushi bëhen tashmë tre. Futbollistja shqiptare e kombëtares gjermane, Fatmire Bajramaj – Alushi dje është bërë për herë të parë nënë. Siç shihet në fotografi, pranë saj ka qëndruar edhe bashkëshorti dhe futbollisti i përfaqësueses së Kosovës Enis Alushi, raporton “albinfo.ch”.

Çifti futbollistik shumë i njohur në Gjermani vogëlushin e ka pagëzuar më emrin Arian. Sapo iu është gëzuar ardhjes në jetë të birit dhe është përkujdesur për shëndetin e bashkëshortes dhe Arianit të vogël, Enisi menjëherë është nisur drejt Kosovës për të qenë pjesë e ndeshjes vëllazërore Kosovë – Shqipëri e cila përfundoi më rezultat 2-2.

Në këtë ndeshje Enisi luajti pjesën më të madhe të lojës duke kontribuar në rezultatin e lojës. Futbollisti i FC St. Pauli në bundesligën e dytë gjermane ditë më parë është rikthyer nga një lëndim i cili e mbajti për gjashtë javë jashtë fushës.