A do të shkojë Kosova në rinumërim total të votave?

Komisioni Qendror i Zgjedhjeve nuk ka marrë ende vendim për rinumërim të plotë të votave në të gjithë Kosovën, pavarësisht kërkesave të shtuara që procesi të shkojë në rinumërim total pas daljes në pah të keqpërdorimeve të votës brenda subjekteve politike. Kështu ka deklaruar zëdhënësi i KQZ-së, Valmir Elezi, duke sqaruar se institucioni vazhdon të qëndrojë pas vendimit të mëparshëm, transmeton albinfo.ch.

Sipas Elezit, bazuar në vendimin e datës 13 janar 2026, rinumërimi i plotë do të realizohet në 10 komuna, ndërsa në 28 komuna të tjera do të rinumërohet vetëm 10 për qind e vendvotimeve.

Ai ka theksuar se, varësisht nga gjetjet që mund të dalin gjatë këtij procesi të pjesshëm të rinumërimit, KQZ mund të marrë vendim të ri për zgjerimin e tij edhe në vendvotime të tjera. “Aktualisht, KQZ nuk ka marrë asnjë vendim tjetër”, ka deklaruar Elezi për Gazetën Insajderi.

Deklarata e KQZ-së vjen në një kohë kur në opinion janë shtuar raportimet dhe reagimet publike për parregullsi dhe keqpërdorime të votës brenda subjekteve politike, çka ka nxitur kërkesa nga aktorë të ndryshëm që procesi i numërimit të shkojë në rinumërim të plotë në të gjithë vendin.

Ndërkohë, mediumi Klan Kosova ka raportuar, duke u thirrur në burime brenda Qendrës së Numërimit dhe Rezultateve (QNR), se ekziston mundësia që i gjithë territori i Kosovës të përfshihet në proces rinumërimi. Sipas këtyre raportimeve, në QNR ka nisur rritja e kapacitetit operacional, përfshirë shtimin e 12 tavolinave të reja të numërimit.