Abdixhiku: Sulmet e bandave kriminale e terroriste nga Beogradi s’mund ta zmbrapsin Kosovën

Foto nga Lumir Abdixhiku në Facebook

Kryetari i Lidhjes Demokratike të Kosovës, Lumir Abdixhiku, ka reaguar pas sulmit të sotëm ndaj Policisë së Kosovës, duke e cilësuar si sulm terrorist.

Përmes një postimi në rrjetin social “Facebook”, ai ka shkruar se këto sulme nga bandat kriminale me adresë në Beograd, nuk mund ta zmbrapsin Kosovën nga e drejta për vendosje të rendit, ligjshmërisë dhe vetë sovranitetit, përcjell albinfo.ch.

“Në këto momente të vështira për vendin, të gjithë jemi me Policinë e Kosovës. Jemi me djemtë e vajzat tona në detyrë në veri. Sulmet e bandave kriminale e terroriste me adresë nga Beogradi s’mund ta zmbrapsin Kosovën nga e drejta për vendosje të rendit, ligjshmërisë e vetë sovranitetit. Institucionet e rendit e drejtësisë të sjellin autorët e këtij krimi sa më parë para drejtësisë”, ka shkruar ai.

Ndër të tjera, ai u shpreh se Kosovës në këto momente i duhet miqtë dhe aleatët.