Administrata publike në Gjermani me mungesë të punëtorëve

Sindikatat e administratës publike në Gjermani kanë ngritur alarmin për mungesën e personelit.

“Nëse politika nuk vepron, kërcënon një kolaps i personelit”, ka thënë Daniel Merbitz, anëtar i kryesisë së Sindikatës së Arsimit dhe Shkencës, GEW për grupin mediatik Funke.

Ndërkohë që zëvendëskryetari i Sindikatës së Policisë, GdP, Michael Mertens paralajmëron se do të ketë mungesë edhe të policëve duke theksuar se nga kjo vuajnë edhe rajonet.

“Nga kjo problematikë vuajnë të gjitha landet, edhe Policia Federale dhe Zyra Federale e Kriminalistikës” u shpreh ai shkruan DW.

Kreu i Shoqatës së Nëpunësve, dbb Ulrich Silberbach vë në dukje pasojat që do të shkaktojë mungesa e personelit.

“Nëse nuk ecim përpara në digjitalizim dhe reduktimin e burokracisë, mungesa e personelit do të çojë në zgjatje të afateve të trajtimit të dokumenteve, do të përkeqësojë kujdestarinë në kopshte dhe në përgjithësi do të dobësohet ndjeshëm aftësia vepruese e shtetit”, tha ai, përcjell albinfo.ch.

Në të gjithë sektorët e arsimit, si në shkolla dhe kopshtet gjermane ka një mungesë të ndjeshme të fuqisë së kualifikuar punëtore.

Sipas të dhënave të shoqatës dbb, ka rreth 360.000 vende pune të zbrazëta janë në sektorin e shërbimit publik shtetëror. Deri në vitin 2030 dalin në pension rreth 1,3 milionë të punësuar të shërbimit publik, shkruan DW.