Agjencia e Akreditimit të Kosovës përjashtohet nga ENQA

Ky vendim u mor në mbledhjen e ENQA-s më 19 shtator

Agjencia Kosovare e Akreditimit nuk do të vazhdojë të jetë pjesë e Asociacionit Europian për Sigurimin e Cilësisë në Arsimin e Lartë (ENQA).

Ky vendim u mor në mbledhjen e ENQA-s më 19 shtator. KALLXO.com ka siguruar letrën që i është dërguar Ushtruesit të Detyrës së Drejtorit të Agjencisë për Akreditim, Avni Gashi.

Në letër ai njoftohet se anëtarësia e Kosovës në këtë organizatë nuk do të vazhdohet. Në letër janë listuar disa arsye, për të cilat bordi i ENQA-s mori këtë vendim, ku thuhet se Agjencia nuk i ka përmbushur rregullat europiane.

Këto arsye përfshijnë “mungesën e konsensusit të gjerë në arsimin e lartë lidhur me rolin dhe aktivitetet e agjencisë”.

Tutje, ata përmendin mungesën e resurseve njerëzore dhe financiare për të realizuar aktivitetet e AKA-së.

ENQA ka dhënë disa rekomandime për Agjencinë e Akreditimit që përfshijnë metodologjinë e veprimit, përfshirjen e studentëve dhe pavarësinë e veprimit, përcjell albinfo.ch.

Pas kritikave, ata kanë përgëzuar këtë agjenci për mundin e bërë në përcjelljen e standardeve europiane dhe i kanë inkurajuar të vazhdojnë përpjekjet.

Më 19 prill të vitit 2018 Agjencisë Kosovare të Akreditimit i ishte degraduar statusi brenda ENQA-s nga anëtare me të drejta të plota në anëtare nën shqyrtim.

Në shkurt të po atij viti një organizatë ndërkombëtare, ‘European Quality Assurance Register for Higher Education’ (EQAR), e kishte përjashtuar Agjencinë Kosovare të Akreditimit nga anëtarësia për shkak të shkarkimit të bordit të kësaj agjencie që ishte bërë me kërkesë të kryeministrit Ramush Haradinaj.

---