Aktorët zbulojnë sekretet e serisë “Game of Thrones”

Ekipi i serisë së njohur “Game of Thrones”, ka parakaluar për herë të fundit në tepihun e kuq, duke kujtuar pjesët më të mira të punës gjatë viteve të kësaj serie.

Disa prej aktorëve që nuk ishin të njohur para se të niste seria, në vitin 2011 ia mësynë Nju Jorkut për sezonin e fundit që transmetohet më 14 prill.

Maisie Williams, që ishte vetëm 13-vjeçare kur filloi rolin e Arya Stark-ut, ka thënë se do t’i mungojnë muajt kur ekipi filmoi në kushte të ftohta, në Irlandën Veriore. “Disa prej kujtimeve më të mira janë kur ne është dashur të mbërthehemi në rroba të trasha që t’i bëjmë ballë të ftohtit. Krijuam një lidhje të mirë, e cila i bënte ballë edhe të ftohtit”, thotë Williams.

Ndërsa, aktorët Sophie Turner, Pilou Asbaek e Conleth Hill, thonë se si kujtim për serinë, kanë ruajtur unaza e gjëra të tjera të personazheve që kanë luajtur.

“Game of Thrones” ka fituar disa çmime Emmy dhe është seria më e shikuar televizive, me 30 milionë shikues gjatë transmetimit të një serie në SHBA. Seria është e njohur për vrasjen e personazheve të dashur, por shumë prej aktorëve që kanë luajtur ata, siç janë Jason Momoa, Natalie Dormer dhe Sean Bean, parakaluan në tepihun e kuq.

“Ky është kilometri i fundit, tepihu i fundit, premiera e fundit. Ky është fundi. Gjithçka ka një fund dhe kjo është mënyrë e përkryer për këtë”, thotë Kristofer Hivju që luan rolin e Tormund Giantsbane.