Ambasada e Francës promovon djathin e Sharrit

Marie-Christine Butel, ambasadorja e Francës në Kosovë, organizon nesër në Rezidencën e Francës një pritje, e cila si qëllim ka promovimin e djathit të Sharrit.

Ky aktivitet organizohet në vazhdën e mbështetjes së Francës për krijimin e një treguesi të parë gjeografik në Kosovë. Për disa vjet me radhë, ekspertë francezë kanë mbështetur institucionet kosovare dhe prodhuesit e djathit të Sharrit në mënyrë që të sigurojnë njohjen e këtij djathi si një tregues gjeografik-emërtim origjine, domethënë një prodhimi bujqësor unik, cilësia e të cilit është e lidhur me zonën në të cilën prodhohet dhe me njohuri të veçantë në përgatitje.

Me këtë rast, shefi i kuzhinës franceze, Christophe Dovergne, do të prezantojë receta bashkëkohore dhe kreative, duke nënvizuar lidhjet ndërmjet kuzhinës franceze dhe asaj kosovare. Anëtar i Akademisë së Kulinarisë të Francës dhe Euro-Toques, Christophe Dovergne, është profesor gatimi dhe bashkëthemelues i faqes 750 gram. Ai ndan kohën e tij midis transmetimit të njohurive dhe përgatitjes së librave të gatimit.

Pritja do të bëhet ditën e premte, më 13 dhjetor, në orën 17:30, në Rezidencën e Francës, shkruan albinfo.ch.

---