Ambasada e SHBA-ve, dështimi me Interpolin nga presioni i Serbisë

Lidhur me zhvillimet në Asamblenë e Përgjithshme të INTERPOL-it, ka reaguar edhe Ambasada e SHBA-ve në Kosovë, në të cilën ndër të tjera thuhet se “me këtë rezultat, të gjithë humbasim”. 

Policia e Kosovës, sipas Ambasadës, është një institucion i aftë dhe i dëshmuar, dhe shumica e vendeve e kanë parë një gjë të tillë dhe kanë mbështetur anëtarësimin e Kosovës në INTERPOL, pavarësisht fushatës së Serbisë, shkruan Albinfo.ch

Kjo situatë, sipas Ambasadës Amerikane, justifikon nevojën për arritjen e marrëveshjes për normalizim të plotë ndërmjet Kosovës e Serbisë. “Ne vazhdojmë fuqimisht ta mbështesim dialogun ndërmjet Kosovës dhe Serbisë, të mundësuar nga BE-ja. Tani më shumë se kurrë, të dy palët duhet t’i shpejtojnë përpjekjet e tyre për të arritur marrëveshje për normalizimin e plotë, që është mënyra e vetme për të dy vendet për të ecur përpara në rrugëtimin e tyre për anëtarësim në BE. Të dyja, Serbia dhe Kosova, duhet ta kuptojnë se rrugëtimi i tyre drejt të ardhmes evropiane shkon përmes normalizimit”, thekson Ambasada e SHBA-së.