Ambasadori Malaj: Çmimi “Diaspora” assesi nuk është anuluar

Malaj: "Calmy Rey nuk e ka refuzuar çmimin. Ajo do ta marrë atë në një kohë të mëvonshme. Nuk ka refuzim dhe as anulim"

Duke raportuar lidhur me aferën më të re “Marty”, disa medie zvicerane i kanë marrë intervista edhe ambasadorit të Kosovës në Bernë, z. Naim Malaj. Në kuadër të një shkrimi të gjatë që ka botuar dje, gazeta Blick citon ambasadorin Malaj, i cili përgënjeshtron akuzat e hetuesit të Këshillit të Evropës, Dick Marty. “Nuk ka aspak dëshmi. UÇK nuk ka pasur fare aparatura për ndërhyrje të tilla si marrje organesh”. Sipas Malajt Marty ka rënë në grackën e propagandës serbe.

Në një intervistë të dhënë televizionit publik zviceran, në emisionin “Tagesschau” ambasadori Malaj veç tjerash ka thënë se “jo vetëm ish UÇK-ja në kohën e saj por as spitalet e Tiranës dhe të Prishtinës nuk kanë disponuar me mjete që nevojiten për nxjerrjen dhe transportimin e organeve të njeriut, për t`i tregtuar ato. Ne po presim dëshmitë e Dick Marty-t, të cilat do të tregonin se si ka ndodhur e gjithë kjo. Por jo duke u bazuar në thënie dëshmitarësh anonimë dhe thashethëna”, ka thënë ambasadori.

Ndërkaq, lajmin më të ri për shtyrjen e marrjes së çmimit “Diaspora” nga ana e presidentes së vendit Micheline Calmy Rey, disa medie e kishin interpretuar gabimisht si refuzim ose anulim të tij. Lidhur me këtë, ambasadori Malaj i ka thënë agjencisë së lajmeve SDA se nuk bëhet fjalë në asnjë mënyrë për anulim.

“Calmy Rey nuk e ka refuzuar çmimin. Ajo do ta marrë atë në një kohë të mëvonshme. Nuk ka refuzim dhe as anulim”, ka thënë Malaj dhe ka shtuar: “Në kontekstin aktual ndoshta është më mirë për të gjithë që kjo datë u shty”. Çmimi, thjesht po harrohej dhe në vend të kësaj po bisedohej për raportin “Marty”, ka thënë veç tjerash ambasadori Malaj.