Jeta në Austri

Ambasadori Pllana: Kosova ka nevojë për një perspektivë të qartë evropiane

Ambasadori i Kosovës në Austri, Lulzim Pllana, në një editorial të botuar të hënën në gazetën austriake “Wienerzeitung”, ka shkruar se përveç problemeve me pandeminë, rruga për në Bashkimin Evropian për Kosovën është ende e paqartë

Ambasadori i Kosovës në Austri, Lulzim Pllana, ka kërkuar nga Bashkimi Evropian që të bëhet e qartë perspektiva evropiane për vendin e tij, Kosovën. Ai ka kujtuar që më 17 shkurt Kosova feston 13-vjetorin e pavarësisë së saj.

“Një vend i vogël në mes të kontinentit evropian, këtë vit po feston 13-të vjetorin e Pavarësisë, dhe si asnjë vend tjetër në rajon, me vështirësi po sfidohet në perspektivën e tij drejt Bashkimit Evropian”, shkruan Pllana në editorialin e tij të botuar të hënën në gazetën austriake, “Wienerzeitung”, përcjell albinfo.at.

Ambasadori kosovar ka nënvizuar edhe premtimet e disa hershme të liberalizimit të vizave të Bashkimit Evropian për Kosovën.

“Liberalizimi i vizave i premtuar shumë herë është akoma vetëm një perspektivë dhe nuk po zbatohet ende për shkak të kundërshtimit nga disa vende anëtare të BE-së. Se kur do të arrihet liria e lëvizjes për shoqërinë me të re të Evropës, mbetet ende e panjohur”, thekson ambasadori kosovar.

Motoja për kosovarët sipas ambasadorit, mbetet integrimi euro – atlantik. Kosova, ka thënë ai është “demografikisht e re, por “Start – ups” dhe zhvilluesit e web-faqeve në vend, janë ndër më të mirët në Evropë. Në mesin e tyre ka edhe artistë shumë të njohur të pop-it që kultivojnë imazhin e Kosovës nëpër botë.  Kjo e bën vendin një aset më shumë për Bashkimin Evropian”, është shprehur ambasadori Pllana.

Tutje ai ka shtuar se shumica e shteteve anëtare të Kombeve të Bashkuara kanë njohur Republikën e Kosovës dhe kanë gjetur gjuhë të përbashkët në formimin e shtetit.

“Deri më tani, Republika e Kosovës është njohur nga 117 shtete. Vendi ka arritur qëllimet e tij ndërkombëtare me mbështetjen e partnerëve të tij të shumtë.  Republika e Kosovës, me mbështetjen e SHBA, kohët e fundit vendosi marrëdhënie diplomatike me Izraelin, të cilat forcojnë pozicionin ndërkombëtar të vendit të vogël. Edhe diplomacia e BE-së gjithashtu mund të arrijë sukses duke i dhënë Kosovës dhe të rinjve Evropianë të Ballkanit Perëndimor një shans të përbashkët, siç është njohja nga ato pesë shtete të BE-së që e bëjnë më të vështirë të gjithë procesin e integrimit”, ka kërkuar ai.

Ambasadori ka bërë të ditur se dialogu me Serbinë gjithashtu duhet të vazhdojë, pasi kjo është mënyra për një zgjidhje përfundimtare për paqen dhe stabilitetin në Ballkan.

“Një pajtim i tillë mund të vijë vetëm përmes njohjes reciproke të shteteve të Kosovës dhe Serbisë. Por, për sa kohë që Bashkimi Evropian heziton në integrimin e rajonit ose ndoshta injoron disa nga ndikimet ekonomike të të tjerëve, këto probleme do të vazhdojnë të ekzistojnë në kontinentin Evropian”, transmeton albinfo.at.

Ambasadori Lulzim Pllana gjithashtu ka vlerësuar Austrinë për mbështetjen e saj politike për Kosovën. “Edhe pse Austria nuk i përkiste NATO-s, ajo megjithatë kishte siguruar paqe dhe qetësi në Ballkan. Austria, sot është një nga partnerët më besnikë të Kosovës”, potencon Lulzim Pllana në fund të editorialit.