Angela Merkel, kancelare e Gjermanisë për herë të katërt

Keystone (EPA/FILIP SINGER)

Angela Merkel është zgjedhur për herë të katërt kancelare e Gjermanisë. Kjo u arrit vetëm gjashtë muaj pas zgjedhjeve parlamentare në Gjermani.

Të mërkurën, 364 deputetë nga 709 gjithsej i dhanë votën kancelares Merkel. Shumica e kërkuar ishte 355 vota, përcjell albinfo.ch.

Në votimin e fshehtë, Merkel mori 35 vota më pak se 399 vendet e aleancës qeveritare mes CDU/CSU dhe Partisë Socialdemokrate, SPD. Rizgjedhja e Merkelit u bë e mundur pas koalicionit me socialdemokratët dhe votës po të bazës së Partisë Socialdemokrate më 4 mars.

Tani qeveria e re gjermane mund të fillojë nga puna. Sfida më e madhe konsiderohet aktualisht përplasjet tregtare me SHBA, pas vendimit të Donald Trump për vendosjen e doganave ndaj çelikut dhe aluminit të importuar. Nga kjo preken ndër të tjera edhe firmat gjermane.