Arrestohet 19-vjeçari i përfshirë në protestat në Lozanë

(KEYSTONE/Cyril Zingaro)

Pas trazirave të ndodhura në Lozanë, policia ka arrestuar një të ri 19-vjeçar, shtetas serb, i cili dyshohet se mori pjesë aktivisht në incidentet e dhunshme, shkruan Blick, transmeton albinfo.ch.

Sipas njoftimit të policisë, i riu ishte i pranishëm gjatë të dy ditëve të trazirave dhe dyshohet se i vuri flakën disa kazanëve të mbeturinave dhe hodhi fishekzjarrë. Identifikimi u bë përmes fotografive nga ngjarja, dhe ai pranoi përgjegjësinë gjatë hetimeve.

Me kërkesë të prokurorit publik, gjykata caktoi paraburgimin si masë detyruese. I riu përballet me akuza për trazira, dhunë ose kërcënime ndaj autoriteteve dhe zyrtarëve në një turmë, dëmtim të pronës në një turmë dhe shkelje të Ligjit për Eksplozivët.

Policia ka njoftuar se hetimet vazhdojnë dhe arrestime të mëtejshme mund të kryhen së shpejti, transmeton albinfo.ch.